വര്‍ണക്കൂടാരം -ബാലവേദി ക്യാമ്പ്

 

    കലുഷിതമായ വര്‍ത്തമാനകാലത്ത് മാനവികതയതയിലൂന്നിയ അനുഭവങ്ങള്‍ കുട്ടികള്‍ക്കായി സമ്മാനിക്കേണ്ടതുണ്ട്. ജാതി മത വര്‍ഗ വര്‍ണ വ്യത്യാസമില്ലാതെ മാനവരെല്ലാം ഒന്നാണെന്ന സന്ദേശത്തിന് പ്രസക്തി ഏറെയുണ്ട് ഇക്കാലത്ത്. സ്റ്റേറ്റ് ലൈബ്രറി കൗണ്‍സില്‍ എല്ലാ അംഗ ഗ്രന്ഥശാലകളിലും ബാലവേദികള്‍ രൂപീകരിച്ച് പ്രവര്‍ത്തനങ്ങള്‍ നടപ്പിലാക്കാന്‍ തീരുമാനിച്ചത് ദു‍ഃഖകരമായ സംഭവങ്ങളുടെ കൂടി പശ്ചാത്തലത്തിലാണ്. ബാലവേദി പ്രവര്‍ത്തനങ്ങള്‍ക്ക് നേതൃത്വം നല്‍കാനായി എല്ലാ ഗ്രന്ഥശാലകളില്‍ നിന്നും രണ്ടുപേര്‍ക്ക്- മെന്റര്‍മാരായി പരിശീലനവും ലഭ്യമാക്കിയിരുന്നു. തുടര്‍ന്ന് അംഗ ഗ്രന്ഥശാലകളില്‍ ബാലവേദികള്‍ രൂപീകരിച്ചു. വാണീവിലാസം ഗ്രന്ഥാലയത്തിലെ ബാലവേദി രൂപീകരണം മെയ് 20 ന് നടന്നു. തുടര്‍ന്ന് കുട്ടികള്‍ക്കായുള്ള ക്യാമ്പ്- വര്‍ണക്കൂടാരം സംഘടിപ്പിക്കാന്‍ തീരുമാനിച്ചു.

    വര്‍ണക്കൂടാരം ബാലവേദി ക്യാമ്പിന്റെ ഉദ്ഘാടനം മെയ് 28 ഞായറാഴ്ച രാവിലെ 10 മണിക്ക് കൂടാളി ഗ്രാമപഞ്ചായത്ത് വികസന- ക്ഷേമകാര്യ സ്റ്റാന്‍റിംഗ് കമ്മറ്റി ചെയർമാന്‍ ശ്രീ കെ ദിവാകരന്‍ നിര്‍വ്വഹിച്ചു. കാണേണടത് കാണാനും കേള്‍ക്കേണ്ടത് കേള്‍ക്കാനും പറയേണ്ടത് പറയാനും കഴിയുന്ന കുട്ടികളായി വളരാന്‍ കഴിവുള്ളവരാകട്ടെ എന്ന് അദ്ദേഹം ഉദ്ഘാടന പ്രസംഗത്തില്‍ ആശംസിച്ചു.  താലൂക്ക് കൗണ്‍സിലർ ശ്രീ കെ ലക്ഷ്മണന്‍ മാസ്റ്റര്‍ അധ്യക്ഷനായിരുന്നു. ബാലവേദി മെന്റര്‍ ശ്രീമതി നിഷ പ്രവര്‍ത്തനപദ്ധതി വിശദീകരിച്ചു.  ലൈബ്രറി കൗണ്‍ിസല്‍ പട്ടാന്നൂര്‍ മേഖല നേതൃ സമിതി കണ്‍വീനര്‍ ശ്രീ പി വി ആനന്ദബാബു, കൊടോളിപ്രം അംഗണ്‍വാടി വര്‍ക്കര്‍ ശ്രീമതി ഹഫ്സത്ത് എന്നിവര്‍ ആശംസകള്‍ നേര്‍ന്ന് സംസാരിച്ചു. ഗ്രന്ഥാലയം സിക്രട്ടറി വി കെ സജിത്ത് കുമാര്‍ സ്വാഗതവും ജോ. സിക്രട്ടറി ശ്രീ ജിതിന്‍ നന്ദിയും പറഞ്ഞു. 

    ലഘുഭക്ഷണത്തിന് ശേഷം വര്‍ണക്കൂടാരം ക്യാമ്പ് പ്രവര്‍ത്തനങ്ങള്‍ ആരംഭിച്ചു. അധ്യാപകനും നാടകപ്രവര്‍ത്തകനും ട്രെയിനറുമായ ശ്രീ രവീന്ദ്രന്‍ പഴശ്ശി ക്യാമ്പ് പ്രവര്‍ത്തനങ്ങള്‍ക്ക് നേതൃത്വം നല്‍കി. ആടിയും പാടിയും കളിച്ചും രസിച്ചും പ്വര്‍ത്തനങ്ങള്‍ പുരോഗമിച്ചു. ഭാഷയുടെ ഭാവാഭിനയത്തിന്റെ വ്യത്യസ്ത തലങ്ങള്‍ കുട്ടികള്‍ അനുഭവിച്ച് അറിഞ്ഞു. അംഗണവാടിയിലെ കുട്ടികള്‍ക്കൊപ്പം ഹൈസ്കൂള്‍ വിഭാഗത്തിലെ കുട്ടികളും ഒരുമിച്ചാണ് ക്യാമ്പിനെ നവ്യാനുഭവമാക്കി മാറ്റിയത്. ഒറിഗാമി സെഷനില്‍ പത്രക്കടലാസുകള്‍ ഫിഷര്‍മെന്‍ ക്യാപ്പും. മാര്‍പ്പാപ്പ തൊപ്പിയും ഗാന്ധിത്തൊപ്പിയും പോലീസ് തൊപ്പിയും പാളത്തൊപ്പിയുമൊക്കെയായി തരം മാറിക്കൊണ്ടിരുന്നു. വടികളും ചിരട്ടകളും പങ്കാളികളുടെ കൈയില്‍ താളപ്പെരുമഴ തീര്‍ത്തു. മെന്ററായ ശ്രീമതി നിഷ, പ്രവര്‍ത്തകസമിതി അംഗങ്ങളായ ശ്രീ രജീഷ്, ലൈബ്രേറിയന്‍ ശ്രീ എം വി ലക്ഷ്മണന്‍ എന്നിവര്‍ പ്രവര്‍ത്തനങ്ങളില്‍ പങ്കാളികളായി.

 ചില ദൃശ്യങ്ങളിലൂടെ . . .

    ബാലവേദി ക്യാമ്പ്- വര്‍ണക്കൂടാരം അവിസ്മരണീയമാക്കാന്‍ സഹായിച്ച എല്ലാവര്‍ക്കും ഗ്രന്ഥാലയത്തിന്റെ നന്ദി അറിയിക്കുന്നു.

ബാലവേദി രൂപീകരണം

     നാളത്തെ ലോകം സുന്ദരമാക്കുന്നത് ഇന്നത്തെ കുട്ടികളാണ്. സമൂഹത്തിലെ നല്ല ഗുണങ്ങളും ചീത്ത ഗുണങ്ങളും അവര്‍ സ്വാശീകരിക്കും. കുട്ടികളെ ഇത്തരം ദുഷ്പ്രവണതകളില്‍ നിന്ന് ബോധപൂര്‍വ്വം അകറ്റി നിര്‍ത്തേണ്ടതുണ്ട്. മൊബൈല്‍ ഫോണിന്റെ തടവറയില്‍ അകപ്പെട്ട് നഷ്ടപ്പെടുന്ന ബാല്യത്തെ തിരിച്ചു പിടിച്ച് കൂട്ടായ്മയുടെ ബാലപാഠങ്ങള്‍ അഭ്യസിപ്പിക്കേണ്ടതുണ്ട്. ജാതി മത വര്‍ഗ രാഷ്ട്രീയ ചിന്തകള്‍ക്കുപരിയായി മാനവികതയുടെ വിശാല ലോകം കാണിച്ചുകൊടുക്കുന്നതിനൊപ്പം അവരുടെ കഴിവുകളെ വികസിപ്പിക്കാനും നമുക്ക് കഴിയണം. സ്റ്റേറ്റ് ലൈബ്രറി കൗണ്‍സില്‍ സംസ്ഥാനതലത്തില്‍ എല്ലാ അംഗ ഗ്രന്ഥശാലകളിലും ബാലവേദികള്‍ രൂപീകരിക്കാന്‍ നിര്‍ദ്ദേശിച്ചത് ഇക്കാരണത്താലാണ്. വാണീവിലാസം ഗ്രന്ഥാലയത്തിലെ ബാലവേദി രൂപീകരണം മെയ് 13 ന് വൈകുന്നേരം നടന്നു. അനൗപചാരികമായി ചേര്‍ന്ന യോഗത്തില്‍ ഗ്രന്ഥാലയം പ്രസിഡണ്ട് ശ്രീ പി വി ദിവാകരന്‍ മാസ്റ്റര്‍, താലൂക്ക് കൗണ്‍സിലര്‍ ശ്രീ കെ ലക്ഷ്മണന്‍ മാസ്റ്റര്‍, ഗ്രന്ഥാലയം പ്രവര്‍ത്തക സമിതി അംഗങ്ങള്‍ എന്നിവര്‍ നേതൃത്വം വഹിച്ചു. വര്‍ണ്ണക്കൂടാരം എന്ന പേരില്‍ ഏകദിന ക്യാമ്പ് നടത്താന്‍ തീരുമാനിച്ചിട്ടുണ്ട്.

ലോക പുസ്തകദിനം ഏപ്രീല്‍ 23

 

    ഏപ്രിൽ 23, ലോകപുസ്തക ദിനം.  സങ്കല്പിക്കുന്നതിനേക്കാള്‍ വേഗത്തില്‍ അതിശയിപ്പിക്കുന്ന രീതിയില്‍ സാങ്കേതിക വിദ്യകള്‍ അരങ്ങുവാഴുന്ന കാലമാണിത്. വായനയ്ക്കു പകരം കാഴ്ചകൾക്കു പ്രാമുഖ്യം നല്കപ്പെടുന്ന ഇക്കാലത്ത്  അച്ചടിച്ച പുസ്തകങ്ങളുടെ വായന കുറഞ്ഞുവരുന്നു. ഒരു കാലത്ത് നാട്ടിന്‍പുറങ്ങളിലെ ഗ്രാമീണ സര്‍വ്വകലാശാലകളായിരുന്ന വായനശാലകള്‍ ഗ്രന്ഥപ്പുരകള്‍ മാത്രമായി മാറിക്കൊണ്ടിരിക്കുന്നു. വായനക്കാരെത്തേടി പുസ്തകങ്ങള്‍ സഞ്ചരിക്കുന്നു ഇക്കാലത്ത്.  വീണ്ടുമൊരു പുസ്തകദിനം കൂടി കടന്നുവരികയാണ് ഏപ്രീല്‍ 23 ന്.

    എന്തുകൊണ്ടാണ് ഏപ്രിൽ 23 ലോക പുസ്തക ദിനമായി ആചരിക്കുന്നത്? വിശ്വസാഹിത്യത്തിലെ തന്നെ അതികായരായ ഷേക്സ്പിയർ, മിഗ്വേൽ ഡേ സർവെൻ്റീസ്, ഗാർസിലാസോ ഡേ ലാ വെഗാ എന്നിവരുടെ ചരമദിനമാണ് ഏപ്രിൽ 23. ലോകസാഹിത്യത്തിൽ വസന്തം തീർത്ത ഈ മഹാന്മാരോടുള്ള ആദര സൂചകമായി ആചരിച്ചു തുടങ്ങിയതാണ് ലോകപുസ്തകദിനം. തുടക്കമിട്ടത് യുനെസ്കോയും. 1995 ൽ യുനെസ്കോയുടെ പൊതു സമ്മേളനമാണ് ഈ തീരുമാനമെടുത്തത്. 

    ആശയ വിനിമയത്തിന്റെ ഉറവിടവും വിജ്ഞാനത്തിലേക്കുള്ള പാതയും പുസ്തകങ്ങള്‍ സൃഷ്ടിക്കുന്നു. മൂല്യമുള്ള പുസ്തകങ്ങള്‍ വിതരണം ചെയ്യുകയും സംരക്ഷിക്കുകയും ചെയ്യേണ്ടതാണ്. വായന മരിക്കുന്നു എന്ന് വിലപിക്കുമ്പോഴും ലോകമെങ്ങും പുസ്തകം വാങ്ങുന്നവരുടെ എണ്ണം കൂടുകയാണ് എന്ന അറിവ് സന്തോഷം പകരുന്നു. വായനയുടെ വസന്തം തീര്‍ക്കാന്‍ നമുക്കും പുസ്തകലോകത്തേക്ക് കടന്നിരിക്കാം. നാട്ടിലെ വായനശാലകളില്‍ ചെന്ന് അഭിരുചിക്കിണങ്ങിയ പുസ്തകങ്ങള്‍ തെരഞ്ഞെടുത്ത് പുതിയ ലോകങ്ങള്‍ തേടാം. എല്ലാവര്‍ക്കും വായനാദിനാശംസകള്‍..

നേത്രപരിശോധനാ ക്യാമ്പ്

     നാം ലോകത്തെ അറിയുന്നത് പഞ്ചേന്ദ്രിയങ്ങളിലൂടെയാണ്. നാം ആര്‍ജ്ജിക്കുന്ന അറിവിന്റെ 60 ശതമാനവും കണ്ണുകളിലൂടെയാണെന്നാണ് കണ്ടെത്തല്‍. കണ്ണിനെ നാം പലപ്പോഴും ശ്രദ്ധിക്കുന്നത് കാഴ്ച വൈകല്യം ഏറ്റവും ഗുരുതരമാവുമ്പോഴാണ്. കണ്ണ് പോയാലേ കണ്ണിന്റെ വിലയറിയൂ എന്ന പഴമൊഴി നാം മറക്കരുതെന്ന ഓര്‍മ്മപ്പെടുത്തലോടെയാണ് കൊടോളിപ്രം വാണീവിലാസം ഗ്രന്ഥാലയം നൂര്‍ മലബാര്‍ ഐ ഹോസ്പിറ്റലുമായി ചേര്‍ന്ന് സൗജന്യ നേത്ര പരിശോധന  തിമിര നിര്‍ണയ ക്യാമ്പ് സംഘടിപ്പിച്ചത്. 

        ക്യാമ്പിന്റെ ഔപചാരിക ഉദ്ഘാടനം കൂടാളി ഗ്രാമപഞ്ചായത്ത് പ്രസിഡണ്ട് ശ്രീമതി പി കെ ഷൈമ നിര്‍വ്വഹിച്ചു. ഗ്രാമപഞ്ചായത്തംഗം ശ്രീ. കെ ഇ രമേശ് കുമാര്‍ അധ്യക്ഷനായിരുന്നു. നൂര്‍ മലബാര്‍ ഐ ക്ലിനിക്കിലെ ഒഫ്താല്‍മോളജിസ്റ്റായ  ഡോ സുമയ്യ ക്ലാസ് നടത്തി.  ഗ്രന്ഥാലയം സിക്രട്ടറി ശ്രീ വി കെ സജിത്ത് കുമാര്‍ സ്വാഗതഭാഷണം നടത്തി. താലൂക്ക് കൗണ്‍സിലര്‍ ശ്രീ കെ ലക്ഷ്മണന്‍ മാസ്റ്റര്‍ ആസംസകള്‍ നേര്‍ന്നു. ഗ്രന്ഥാലയം പ്രവര്‍ത്തക സമിതി അംഗം ശ്രീ പി വി രജീഷ് നന്ദി പ്രകാശിപ്പിച്ചു.  പ്രവര്‍ത്തനങ്ങള്‍ക്ക് ഗ്രന്ഥശാലാ പ്രവര്‍ത്തകര്‍ നേതൃത്വം വഹിച്ചു. 

        തുടര്‍ന്ന് നേത്രപരിശോധന, തിമിര നിര്‍ണയം, മരുന്ന് വിതരണം എന്നിവ നടന്നു. 6 ലധികം പേര്‍ പങ്കെടുത്തു. കണ്ണട ആവശ്യമുള്ളവര്‍ക്ക് സൗജന്യ നിരക്കില്‍ കണ്ണട വിതരണം ചെയ്യും. ശസ്ത്രക്രിയ ആവശ്യമുള്ളവര്‍ക്ക് ഏറ്റവും കുറഞ്ഞ ചെലവില്‍ ലഭ്യമാക്കാമെന്നും ആശുപത്രി അധികൃതര്‍ അറിയിച്ചിട്ടുണ്ട്.

ഗ്രന്ഥാലയത്തിന് ബ്ലോഗായി

     ശാസ്ത്രദിനാഘോഷം ഗ്രന്ഥാലയം സമുചിതമായി ആഘോഷിച്ചു. കുട്ടികള്‍ക്കായി മള്‍ട്ടി മീഡിയ ക്വിസ് മത്സരം നടന്നു. 

        തുടര്‍ന്ന നടന്ന പൊതു സമ്മേളത്തിന്റെ ഉദ്ഘാടനവും സി വി രാമന്‍ പ്രഭാഷണവും ശ്രീ. കെ പ്രതാപന്‍ (അസി. പ്രൊഫസര്‍, ഗവ. ബ്രണ്ണന്‍ കോളേജ് തലശ്ശേരി) നിര്‍വ്വഹിച്ചു. സി വി രാമന്‍ ആരായിരുന്നുവെന്നും എന്തുകൊണ്ട് അദ്ദേഹത്തെ മാതൃകയാക്കണമെന്നും അദ്ദേഹം ലളിതമായും സരസമായും വിശദീകരിച്ചു. 

    കണ്ണൂര്‍ സര്‍വ്വകലാശാല ജോ. രജിസ്ട്രാര്‍ ശ്രീ ആര്‍ കെ വിജയന്‍ ഗ്രന്ഥാലയത്തിലേക്ക് സംഭാവനയായി നല്‍കിയ പുസ്തകങ്ങള്‍ ഗ്രന്ഥാലയ ഭാരവാഹികള്‍ ഏറ്റുവാങ്ങി. തുടര്‍ന്ന് കൂടാളി ഗ്രാമപഞ്ചായത്തിലെ തന്നെ ഒരു ഗ്രന്ഥാലയത്തിന്റെ ആദ്യ ബ്ലോഗ് ശ്രീ ആര്‍ കെ വിജയന്‍ സ്വിച്ച് ഓണ്‍ ചെയ്തു. https://vaneevilasam.blogspot.com/ എന്ന മേല്‍വിലാസത്തില്‍ ലോകത്തില്‍ എവിടെ നിന്നും ഇനി ഗ്രന്ഥാലയ വിശേഷങ്ങള്‍ അറിയാം. 

            പൊതു സമ്മേളനത്തില്‍ ഗ്രന്ഥാലയ സിക്രട്ടറി ശ്രീ വി കെ സജിത്ത് കുമാര്‍ സ്വാഗതമാശംസിച്ചു. ഗ്രന്ഥാലയം പ്രസിഡണ്ട് ശ്രീ പി വി ദിവാകരന്‍ അധ്യക്ഷനായിരുന്നു. താലൂക്ക് കൗണ്‍സില്‍ ശ്രീ കെ ലക്ഷ്മണന്‍ മാസ്റ്റര്‍ ആശംസകള്‍ നേര്‍ന്ന് സംസാരിച്ചു. കുട്ടികള്‍ക്കായി ശ്രീ സജിത്ത് കുമാര്‍ ചില പരീക്ഷണപ്രവര്‍ത്തനങ്ങളും നടത്തി. ജോ. സിക്രട്ടറി ശ്രീ ജി തിന്‍ സി ചടങ്ങിന് നന്ദി പ്രകാശിപ്പിച്ചു. 

ശാസ്ത്രദിനാഘോഷവും ബ്ലോഗ് പ്രകാശനവും

                                   

    മനുഷ്യന്‍ ആര്‍ജിച്ച എല്ലാ പുരോഗതിയുടെയും അടിസ്ഥാനം ശാസ്ത്രമാണ്. നമ്മളിന്ന് അനുഭവിക്കുന്ന എല്ലാ സുഖസൗകര്യങ്ങള്‍ക്കും നാം ശാസ്ത്രത്തോട് കടപ്പെട്ടിരിക്കുന്നു. ശാസ്ത്രത്തിന്റെ ഗുണഫലങ്ങള്‍ സ്വീകരിക്കാത്ത ആരും തന്നെ ഈ ലോകത്തിലില്ല. പ്രകൃതി പ്രതിഭാസങ്ങളെയെല്ലാം എന്ത് ? എന്തുകൊണ്ട് ? എങ്ങനെ ? എന്നീ ചോദ്യങ്ങളിലൂടെ അറിയാനും മാറ്റിത്തീര്‍ക്കാനുമുള്ള ചിട്ടപ്പെടുത്തിയ പ്രവര്‍ത്തനങ്ങളാണ് ശാസ്ത്രലോകത്ത് നടക്കുന്നത്. കുറെയധികം വസ്തുതതകളുടെ സഞ്ചയമല്ല ശാസ്ത്രം, മറിച്ച് അതൊരു  പ്രവര്‍ത്തന രീതിയാണ്. ഈ രീതിശാസ്ത്രം മനസ്സിലാക്കാത്തവരാണ് ശാസ്ത്രബോധം ഇല്ലാത്തവരായി മാറുന്നത്. 

    ഇന്ത്യ കണ്ട ഏറ്റവും മികച്ച ശാസ്ത്രജ്ഞനായ സി വി രാമന്‍ തന്റെ കണ്ടെത്തലായ രാമന്‍ പ്രഭാവം ലോകത്തോട് പ്രഖ്യാപിച്ചത് 1928 ഫിബ്രവരി 28 നാണ്. ആദിനത്തിന്റെ ഓര്‍മ്മക്കായാണ് 1987 മുതല്‍ എല്ലാ വര്‍ഷവും ഫിബ്രവരി 28 ദേശീയ ശാസ്ത്രദിനമായി ആഘോഷിക്കാന്‍ തീരുമാനിക്കുന്നത്.

    ഇന്ത്യയില്‍ ജനിച്ച് ഇന്ത്യയില്‍ വളര്‍ന്ന് ഇന്ത്യയില്‍ വിദ്യാഭ്യാസം നടത്തി തികച്ചും ഇന്ത്യക്കാരനായി ജീവിച്ച ശാസ്ത്രജ്ഞനായിരുന്നു ചന്ദ്രശേഖര വെങ്കിട്ടരാമന്‍ എന്ന സി വി രാമന്‍. സ്വന്തമായി ഡിസൈന്‍ ചെയ്ത് നിര്‍മ്മിച്ച ഉപകരണങ്ങള്‍ ഉപയോഗിച്ചു തന്നെ നോബല്‍ സ്വന്തമാക്കിയ നോബല്‍ സമ്മാനിതമായ കണ്ടുപിടുത്തം (1930 ലെ ഭൗതികത്തിനുള്ള നോബല്‍ സമ്മാനം) നടത്തിയ അദ്ദേഹത്തിന്റെ പ്രവര്‍ത്തനങ്ങള്‍ നമുക്കും മാര്‍ഗ‍ഗദര്‍ശകമാവട്ടെ.

    ദേശീയ ശാസ്ത്രദിനാഘോഷത്തിന്റെ ഭാഗമായി ഗ്രന്ഥാലയം ഫിബ്രവരി 26 ന് വിവിധ പരിപാടികള്‍ നടത്തുകയാണ്. ഒപ്പം ഗ്രന്ഥാലയത്തിന്റെ ബ്ലോഗിന്റെ പ്രകാശനവും നടക്കും. പരിപാടികളിലേക്ക് എല്ലാവരേയും ക്ഷണിക്കുന്നു.

റിപ്പബ്ലിക് ദിനാഘോഷം

    ജനക്ഷേമരാഷ്ട്രം എന്നാണ് റിപ്പബ്ലിക് എന്ന വാക്കിന്റെ അര്‍ത്ഥം. നമ്മുടെ രാജ്യം റിപ്പബ്ലിക് ആയത് 1956 ജനുവരി 26 നാണ്. 1947 ആഗസ്ത് 15 ന് സ്വാതന്ത്ര്യ പ്രഖ്യാപനം ഉണ്ടായെങ്കിലും സ്വന്തമായ ഒരു നിയമസംവിധാനം- ഭരണഘടന നമുക്കുണ്ടായിരുന്നില്ല. സ്വതന്ത്ര ഇന്ത്യയ്ക്ക് ഭരണഘടന എഴുതിയുണ്ടാക്കുന്ന ബൃഹദ് ദൗത്യം  ഡോ. ബി ആര്‍ അംബദ്കര്‍ അദ്ധ്യക്ഷനായ കമ്മിറ്റിയെ ഏല്‍പ്പിച്ചു. അങ്ങനെ ഭരണഘടനയുടെ ആദ്യ രൂപം 1947 നവംബര്‍ 4-ന് കോണ്‍സ്റ്റിറ്റ്യൂന്റ് അസംബ്ലിയില്‍ സമര്‍പ്പിച്ചു. ഒട്ടേറെ ചര്‍ച്ചകള്‍ക്കും മാറ്റങ്ങള്‍ക്കും അവസാനം 395 ആര്‍ട്ടിക്കിളുകളും, 8 ഷെഡ്യൂളുകളുമുള്ള ഭരണഘടന അസംബ്ലി അംഗീകരിച്ചു. ലോകത്തിലേക്കും ഏറ്റവും വലുതായ ലിഖിത ഭരണഘ്ടനയാണ് നമുക്കുള്ളത്. 1950 ജനുവരി 24-നാണ് ഭരണഘടനയുടെ ലിഖിത രൂപത്തിന് അസംബ്ളി അംഗീകാരം നല്‍കുന്നത്. അതനുസരിച്ച് ആദ്യ രാഷ്ട്രപതിയായി തിരഞ്ഞെടുക്കപ്പെട്ട ഡോ. രാജേന്ദ്രപ്രസാദ് ഭരണഘടന അംഗീകരിച്ചുകൊണ്ട് 1950 ജനുവരി 26-ന് ഒപ്പിട്ടു.

    റിപ്പബ്ലിക് ദിനം ജനുവരി 26 എന്ന ദിനം ആകസ്മികമായി വന്നു ചേര്‍ന്നതല്ല.  സ്വരാജ് അല്ലെങ്കില്‍ സ്വയംഭരണത്തിന് വേണ്ടിയുള്ള ഇന്ത്യയുടെ പോരാട്ടത്തില്‍ ജനുവരി 26 ന് വലിയ പ്രാധാന്യമാണുള്ളത്.  1929 ഡിസംബര്‍ 29-ന് ലാഹോറില്‍ ചേര്‍ന്ന കോണ്‍ഗ്രസ് സമ്മേളനമാണ്  പൂര്‍ണ സ്വരാജ് അഥവാ സമ്പൂര്‍ണ്ണ സ്വയംഭരണം ഇന്ത്യയുടെ ലക്ഷ്യമായി പ്രഖ്യാപിക്കുന്ന പ്രമേയം പാസാക്കിയത്. ജനുവരി 26 ഇന്ത്യയൊട്ടാകെ പൂര്‍ണ സ്വരാജ് ദിനമായി ആചരിക്കണമെന്നും തീരുമാനിച്ചു. അങ്ങനെ 1930 ജനുവരി 26-നാണ് ആദ്യമായി സമ്പൂര്‍ണ സ്വാതന്ത്ര്യദിനം ആഘോഷിച്ചത്. ഈ ദിനത്തിന്റെ ഓര്‍മ്മക്കായാണ് ജനുവരി 26 റിപ്പബ്ലിക് ദിനമാക്കാന്‍ തീരുമാനിച്ചത്.

    ഗ്രന്ഥാലയത്തിന്റെ നേതൃത്വത്തില്‍ റിപ്പബ്ലിക് ദിനം സമുചിതമായി ആഘോഷിച്ചു. രാവിലെ 9 മണിക്ക് താലൂക്ക് കൗണ്‍സിലര്‍ ശ്രി.കെ ലക്ഷ്മണന്‍ മാസ്റ്റര്‍ പതാക ഉയര്‍ത്തി. വൈകുന്നേരം കുട്ടികള്‍ക്കായി ക്വിസ് മത്സരം നടന്നു. ക്വിസ് മത്സരത്തിന് ശേഷം നടന്ന പൊതു സമ്മേളനം വാര്‍ഡ് അംഗം ശ്രീ കെ ഇ രമേശ് കുമാര്‍ നിര്‍വ്വഹിച്ചു. സിക്രട്ടറി ശ്രീ വി കെ സജിത്ത് കുമാര്‍ സ്വാഗതമാശംസസിച്ച ചടങ്ങില്‍ ഗ്രന്ഥാലയം വൈസ് പ്രസിഡണ്ട് ശ്രീ കെ ബാലകൃഷ്ണന്‍ അധ്യക്ഷത വഹിച്ചു. താലൂക്ക് കൗണ്‍സിലര്‍ ശ്രീ കെ ലക്ഷ്മണന്‍ മാസ്റ്റര്‍ റിപ്പബ്ലിക് ദിന സന്ദേശം നല്‍കി. ശ്രീമതി ചഞ്ചലാക്ഷി, ശ്രീ കൃഷ്ണകുമാര്‍ എന്നിവര്‍ ആശംസകള്‍ നേര്‍ന്നു. നേതൃസമിതി കണ്‍വീനര്‍ ശ്രീ പി വി ആനന്ദ ബാബു സമ്മാനങ്ങള്‍ വിതരണം ചെയ്തു. ഗ്രന്ഥാലയം ജോ സിക്രട്ടറി ശ്രീ ജിതിന്‍ നന്ദി പ്രകാശിപ്പിച്ചു.